桐 花 樹 下

台灣客家

台灣客家，

頭擺二三百年前，

開台祖渡過險惡黑水溝，

咬薑啜醋，開山闢地，

適泥漿肚建立起，

安身立命傳宗接代大家園。

台灣客家，

既經勇敢企出來，

毋係台灣社會隱形人，

乜毋係台灣介人客，

佇這地跡落地生根，

頭頂台灣天，腳踏台灣地，

做得講係頂天立地台灣好漢，

同河洛原新住民共樣，

組織成台灣主人。

台灣客家，

愛為台灣前途打拚，

佇「極統納獨」佬「極獨納統」，

兩片莫名其妙鬥法中，

我等愛企奈片？

為了將來子孫好生活，

硬程客家志氣高，

相信我等會算分天斷，

甘願過水毋過橋，

愛同原鄉父老兄弟姐妹講：

愐汝一番又一番，

心肝脫得十二層，

毋故歇久他鄉變故鄉，

台灣乜係客家新故鄉。

註

頭擺：從前

適：從

既經：已經

乜毋係：也不是

企奈片：站哪邊

硬程：剛毅

愐汝：想你

歇久：住久

桐 花 樹 下

台灣之光

蘇院長新上台，

隨身帶等大家盡熟識，

親民又溫暖介電火球，

金光閃閃端氣千條，

適遠遠介台灣尾，

一路燁燁光到台灣頭！

二千三百萬個台灣人民，

四千六百萬粒目珠，

全部也同時尖佇共下，

發出熱烈期待金光，

愛看蘇院長介精彩演出。

蘇院長定著愛，

堅持本土化路線，

粉碎鎖國污衊，

清除左右搖擺，

本土化係台灣意識地基，

係台灣人民安身立命堡壘，

恁樣介台灣人，

正能堂堂行出台灣，

有尊嚴全世界走透透。

加油！加油！

蘇院長！

今晡日開始，

適台灣頭，

再一路燁燁光到全世界，

相信蘇院長電火球，

係台灣之光！

註

盡熟識：很熟識

適：di，從

尖佇共下：擠在一起

定著愛：一定要

恁樣介：這樣的

今晡日：今天，現在

桐 花 樹 下

吾黨所宗？

黨係黨，國係國，

黨國分清係鐵則，

不清不楚失黨格，

拖累國家好名節，

恁樣蹊蹊蹺蹺，

定著分人笑譚又過嘴。

歷史滔滔長江水，

水源頭，認毋識，

國中有黨，黨中有國，

正會國旗通黨旗！

一人治國，一黨獨大，

暗中僥人運作無奇怪，

掩等人民目珠耳公，

夜黑風高，五鬼搬運，

國庫通黨庫！

軍歌愛唱，

應該唱出國家好精神，

毋係唱出吾黨新氣象，

軍歌仰好通黨歌？

頭擺原罪莫閣講，

從今黨國莫混淆，

朕即天下既經過時，

吾黨即天下乜失人心，

現下各黨公平企共下，

不分吾黨其黨，

再造國旗軍歌介真意，

遽遽修創新味緒！

註：

過嘴：批評

恁樣蹊蹊蹺蹺：這樣奇詭

定著分人：一定讓人

掩等：掩am，掩住

目珠耳公：眼睛耳朵，喻視聽

仰好：怎麼可以

頭擺：從前

企共下：站在一起

既經：已經

新味緒：新的味道

桐 花 樹 下

台灣新年

盼望台灣2006新年，

同台灣各地歡歡喜喜放介，

恁湛恁靚介煙火共樣，

形勢一片大好！

盼望各政黨，

較少陰謀詭計，

較多同情承擔，

毋好擱用賤嘴論政，

乜毋好擱用惡拳立法，

拆忒意識形態籬笆，

推倒本位主義圍牆，

恁樣正係，

馬主席講介「趕快醒醒」！

無論原住民新住民河洛客家，

親不親，台灣人，

共下佇台灣這隻船肚，

大環境風烈浪高，

我等隨時要接受嚴格考驗，

奈有閒時互相冤家吵事？

假使無同心協力，

船仔仰般平穩駛向願景？

盼望台灣2006新年，

逐儕新思維新作為，

企穩台灣放眼世界，

認同這片土地，

斷真和解共生，

發揮台灣全民力量，

手牽手心連心，

為台灣利益打拚！

註：

拆忒：拆掉

恁樣正係：這樣才是

奈有：那有

仰般：如何

斷真：真正

逐儕：大家

桐 花 樹 下

台灣好家園

選舉親像民主國家內戰，

你死我生介選舉大戲結束後，

逐儕應該遽遽褪下虛幻激情，

回歸原本燒冷人生介正常生活。

汝係綠色也好，

係藍色也好，

或者係綠皮藍骨也好，

係藍皮綠骨也好，

請低頭認真看腳下企介土地，

淨有唯一介名：

安著「台灣」。

綠色贏也好，

藍色贏也好，

假使「台灣」無贏，

大家係毋係共樣輸了了？

選舉時節，

綠為綠打拚，藍為藍打拚，

到裡尾係毋係愛為「台灣」打拚？

大樹根連根，政黨心連心，

政治人物愛清醒，

「台灣」有希望，

政黨正有好將來，

適今晡日開始，

請汝等超脫自家政黨利益，

共下為「台灣」共創好家園！

註：

逐儕：da sa，每個人

淨有：衹有

到裡尾：最終

適：dui，從

今晡日：今天

共下：一起

桐 花 樹 下

教育解嚴

頭那頂項種頭那毛，

要種成麼介樣式，

係麼儕來決定？

頭擺有無留辮，

就毋留頭介惡規定，

現下人既經剪忒專制辮仔，

留下自由自在介頭那，

頭那毛愛仰般處理，

自家歡喜就好，

實在毋使他人獨裁。

一座學校係一座花園，

學生係各種各樣介花樹，

做麼介愛規定，

佢等開共色介花？

生成共款介樹仔？

愛相信學生，

追求盡好盡靚介善意，

分佢等發揮自愛自治，

這正係教育介真精神。

用毋信付介方式嚴管嚴教，

到尾可能創造出下一代：

毋曉得承擔責任，

無獨立思想介草莓族！

恁湛恁靚介台灣，

期待教育思想大門，

遽遽打開分春風吹入來，

學生仔像千萬蕾花齊放！

到處做得鼻著，

台灣教育思想介自由花香！

註：

頭那頂項：頭頂上

麼儕：誰

頭擺：從前

毋使：不必

到尾：結果

桐 花 樹 下

台灣和解

食台灣米飲台灣水，

族群相惜像戽水上天，

恁樣介台灣人，

敢毋會壞勢？

離鄉不離腔，

我講客家話汝講河洛話，

佢講北京話抑係原住民話，

這全部都係台灣話。

有人講客家話有音無字，

仰會好愁毋愁，

愁六月天無日頭？

這係強勢語族介拗蠻，

事實客話有音乜有字，

汝寫「可以」我寫「使得」，

汝寫「對不對」我寫「著無著」，

「茄子」係「吊菜」，

「鋤頭」係「钁頭」。

問題佇這位：

我等有認同自家人無？

有心打石石成磚，

無心打井井無泉，

適今晡日開始，

大聲講客家話，

大膽寫客家文，

「蜻蜓」變「揚尾」，

「老鷹」變「鷂婆」，

承蒙台灣逐儕人，

共下來相和！

註：

戽水上天：喻很困難

抑係：或是

乜：mei，也

我等：我們，亦寫成「我兜」

適：di，從

今晡日：今天

共下：一起